Վրաստանից ՀՀ երկաթուղային բեռնափոխադրումների մաքսային ձևակերպումների գործառույթները ժամանակավորապես կդադարեցվեն
ԵՐԵՎԱՆ, 20 օգոստոսի./ԱՌԿԱ/. ՊԵԿ-ն իրազեկում է, որ Այրում-Ջիլիզայի մաքսային-կետ բաժինը ժամանակավորապես չի իրականացնի երկաթուղային բեռնափոխադրումների մաքսային ձևակերպումների գործառույթներ: Այս մասին հաղորդում է ՊԵԿ մամուլի ծառայությունը:
«Պետական եկամուտների կոմիտեն բեռնափոխադրողներին իրազեկում է, որ սեպտեմբերի 1-ից 16-ը Վրաստանից Հայաստան երկաթուղային երթևեկության ժամանակավոր դադարեցմամբ պայմանավորված` Արևելյան մաքսատուն-վարչության Այրում-Ջիլիզայի մաքսային-կետ բաժինը հիշյալ ժամանակահատվածում չի իրականացնի երկաթուղային բեռնափոխադրումների մաքսային ձևակերպումների գործառույթները։ Դրանք կվերականգնվեն երկաթուղու շահագործումը վերսկսելուն պես»,- նշվում է հաղորդագրության մեջ:
«Հարավկովկասյան երկաթուղի» ընկերությունն ավելի վաղ հայտնել էր, որ Թբիլիսիի տարածքով անցնող երկաթուղային միջուղում կամրջի շինարարության պատճառով, սեպտեմբերի 1-ից 16-ը ժամանակավորապես կդադարեցվի Հայաստանի ուղղությամբ երկաթուղային երթևեկությունը: -0-
