Արագածոտնի մարզով անցնող Մ-3 միջպետական ավտոճանապարհին նոր արագաչափ կգործարկվի
12.12.2016,
12:54
Արագաչափը կգործարկվի 2016 թվականի դեկտեմբերի 16-ից:
ԵՐԵՎԱՆ, 12 դեկտեմբերի. /ԱՌԿԱ/. Ճանապարհային ոստիկանությունը տեղեկացնում է, որ շարունակվում են երթևեկության նկատմամբ վերահսկողության, իրավախախտումների արձանագրման տեսախցիկների և արագաչափ սարքերի տեղադրման աշխատանքները:
Մասնավորապես, 2016 թվականի դեկտեմբերի 16-ից գործարկվելու է «Մ-3 Թուրքիայի սահման-Մարգարա-Վանաձոր-Տաշիր-Վրաստանի սահման» միջպետական նշանակության ավտոճանապարհի Արագածոտնի մարզի Հարթավան գյուղի վարչական տարածքով անցնող հատվածում տեղադրված արագաչափ սարքը՝ երկու ուղղություններով, որտեղ երթևեկության թույլատրելի արագությունը 70 կմ/ժ է:
«Ճանապարհային ոստիկանությունը հորդորում է վարորդներին պահպանել ճանապարհային երթևեկության կանոնները», - նշվում է հաղորդագրության մեջ: -0-
