«Հայկական բրենդին» հարցականի տակ է. Ջրբաշյանը քննադատել է չափանիշների և հնեցման մեթոդների մոտեցումը
ԵՐԵՎԱՆ, 20 ապրիլի․/ԱՌԿԱ/․ Ամերիաբանկի կառավարման խորհրդատվական ծառայության ղեկավար Տիգրան Ջրբաշյանը քննադատել է Հայաստանի կառավարության մոտեցումը աշխարհագրական նշման ներքո «հայկական բրենդի» արտադրելու չափանիշների նկատմամբ։
«Հետաքրքիր է` այդ ի՞նչ «գիտեն» հայ արտադրողները, որ չգիտեն ամբողջ աշխարհի բրենդի արտադրողները։ Ո՞րն է այն նոու-հաուն (անգլերեն` know-how), որին տիրապետում են հայ արտադրողները, և որը նորարարություն է ամբողջ աշխարհում` աշխարհագրական նշման (GI) ներքո բրենդիի արտադրության գործընթացում օգտագործել կաղնու փայտի տարատեսակներով հնեցում (կաղնու տակառից բացի) ու հավակնել մնալ բարձրակարգ խմիչքների շուկայի մատակարարների շարքերում»,-գրել է նա Facebook-ի իր էջում։
Նա կասկածի տակ է դրել կաղնու փայտի օգտագործման թույլատրելիությունը ավանդական տակառի հնեցման հետ մեկտեղ՝ նշելով, որ նման պրակտիկան կարող է խաթարել նման խմիչքների որակի խիստ միջազգային պահանջները։
Ջրբաշյանը համեմատել է ներկայիս և առաջարկվող կանոնակարգերը համաշխարհային առաջատար կոնյակ արտադրողների պրակտիկայի հետ և նշել, որ մի շարք երկրներ (Ֆրանսիա, Իսպանիա և Հարավային Ամերիկա) կիրառում են ավելի խիստ հնեցման և պիտակավորման չափանիշներ։ Նա կարծում է, որ խիստ կանոնակարգերը նպաստում են արտադրանքի միջազգային ճանաչմանը։
Նա նաև մտահոգություն է հայտնել, որ Հայաստանի աշխարհագրական նշման չափորոշիչները կարող են ավելի ազատական լինել, քան միջազգային պրակտիկան, և կասկածի տակ է դրել նման մեղմացման նպատակահարմարությունը արդյունաբերության երկարաժամկետ զարգացման և արտադրանքի որակի տեսանկյունից։
Ինչո՞ւ բրենդի՝ կոնյակի փոխարեն
Հայկական արտադրանքի համար «կոնյակ» անվանումն օգտագործելուց հրաժարվելը կապված է ԵՄ-ՀՀ համապարփակ և ընդլայնված գործընկերության համաձայնագրի (CEPA) շրջանակում Հայաստանի ստանձնած պարտավորությունների հետ։ Համաձայնագրի համաձայն՝ կոնյակը ԵՄ-ի պաշտպանված աշխարհագրական նշագիր է (PGI) և կարող է կիրառվել միայն Ֆրանսիայի Կոնյակի շրջանում արտադրված արտադրանքի համար։
CEPA-ն ուժի մեջ է մտել 2021 թվականի մարտի 1-ին։ Համաձայնագիրը նախատեսում է անցումային ժամանակահատված՝ այս անվանման օգտագործումը Հայաստանում դադարեցնելու համար, ինչպես նաև ԵՄ-ի կողմից տեխնիկական և ֆինանսական աջակցություն՝ հայկական արտադրանքի նոր անվանման ստեղծման համար։
