Երևանում «Կասկադ» մշակութային հանգույցի կառուցումը գնահատվում է մոտ 70 մլն դոլար. քաղաքապետ
ԵՐԵՎԱՆ, 8 դեկտեմբեր․/ԱՌԿԱ/. «Կասկադ» մշակութային հանգույցի կառուցման համար նախատեսված ֆինանսավորումը գնահատվում է մոտ 70 մլն դոլար, հայտարարել է Երևանի քաղաքապետ Տիգրան Ավինյանը։
«Ստորագրվել է շատ կարևոր համաձայնագիր, որն անցել է շատ դժվար փուլերով, և սա լուծում է տասնամյակներ շարունակ առկա խնդիրը։ Լուծվում է ոչ միայն քաղաքաշինության հարցը, այլև ստեղծվում են քաղաքի համար կենսականորեն կարևոր ենթակառուցվածքներ։ Քաղաքը կունենա գեղեցիկ համերգասրահ՝ ավելի քան 1000 նստատեղով, ժամանակակից արվեստի համար նոր թանգարանի տարածքներ և տարատեսակ հանրային տարածքներ, որոնք կպատկանեն քաղաքին», - նշել է Ավինյանը երկուշաբթի քաղաքապետարանում տեղի ունեցած գործակարգավարական խորհրդակցության ժամանակ։
«Այս ծրագիրը նաև ներառում է հարակից հատվածում գտնվող համայնքային հողամասի բարեկարգման և որպես քաղաքային այգի այն ձևավորելու նախաձեռնություն, որը ներդրումային առաջարկի մաս է»,-ասել է քաղաքապետի խորհրդական Սոնա Թևանյանը։
Թևանյանի խոսքով, ամբողջ ծրագրի իրականացման արդյունքում ապահովվելու են ճանապարհային հանգույցներ, մուտքեր և ելքեր դեպի նոր կառուցվող մշակութային հանգույց, թաղամաս և քաղաքային այգի:
«Ծրագրի իրականացման նախատեսվող ժամկետը՝ շինարարության թույլտվության պահից հաշված, 5 տարիների ընթացքն է, որի ամբողջ ժամանակահատվածում պետք է հնարավոր լինի ապահովել մշակութային հանգույցի ամբողջական կառուցումը, և այն շահագործման ենթակա վիճակում համայնքին որպես սեփականություն ներդրողի կողմից փոխանցելը»,- ասել է նա:
