Ավտոսիրողները բալային համակարգի դեմ ավտոերթ կանցկացնեն Հանրապետության հրապարակում
ԵՐԵՎԱՆ, 10 հունվարի. /ԱՌԿԱ/. Ավտոսիրողները պատրաստվում են ավտոերթ անցկացնել Հանրապետության հրապարակում` դրանով արտահայտելով իրենց բողոքը բալային համակարգի դեմ: Այս մասին հայտնում է «Ժամանակ» օրաթերթը:
Ինչպես նշում է հրատարակչությունը, կառավարության նոր նախաձեռնությունները շարունակում են հանրային դժգոհություն հարուցել: Եվ թերթի տեղեկություններով` ավտոսիրողների տարբեր խմբեր քննարկում են Հանրապետության հրապարակում ավտոերթ անցկացնելու հնարավորության հարցը:
«Ավտոերթի մասնակիցները դրանով իրենց բողոքն են արտահայտելու ընդդեմ ճանապարհային կանոնները խախտելու համար նախատեսված բալային համակարգի` առաջարկելով, որ կառավարությունը հրաժարվի փոփոխությունների իրագործման գաղափարից»,- ասվում է հոդվածում:
Չնայած կառավարության հիմնավորումներին, որ այդ փոփոխությունների նպատակը ճանապարհատրանսպորտային պատահարների թվի նվազեցումն է, ինչպես նշում է հրատարակչությունը, ըստ փորձագետների` պատահարների քանակի նման աննախադեպ աճը պայմանավորված է մեքենաների թվի ավելացմամբ և նոր պահանջներին Հայաստանի ճանապարհային ենթակառուցվածքների անհամապատասխանելիությամբ:-0-
