Նախարարությունը գործատուներին փոխհատուցում կտրամադրի հաշմանդամություն ունեցող անձանց և 63 տարեկանից բարձր քաղաքացիների աշխատանքի տեղավորման համար

ԵՐԵՎԱՆ, 18 հունիսի․/ԱՌԿԱ/․ ՀՀ աշխատանքի և սոցիալական հարցերի նախարարությունը մշակել է հաշմանդամություն ունեցող անձանց և 63 տարեկանից բարձր քաղաքացիների զբաղվածության ապահովման ծրագիր։ Նախագիծը հինգշաբթի կառավարության նիստում ներկայացրել է ՀՀ աշխատանքի և սոցիալական հարցերի նախարար Արսեն Թորոսյանը։

«Նախագծով առաջարկում ենք առաջին կամ երկրորդ խմբի հաշմանդամություն ունեցող անձանց, կամ ֆունկցիոնալության խորը կամ ծանր աստիճանի սահմանափակում ունեցող անձանց, և 63-ից բարձր տարիք ունեցող անձանց համար զբաղվածության նոր ծրագիր», - ասաց Թորոսյանը։

Նա նշեց, որ ծրագրի իրականացումը կնպաստի նրանց ակտիվ ներգրավվածությանը հասարակական և տնտեսական կյանքում` ապահովելով արժանապատիվ ինքնաիրացում, լրացուցիչ եկամուտների ձևավորում և սոցիալական ակտիվության բարձրացում։

Ծրագրի անհրաշեշտությունը պայմանավորված է այն հանգամանքով, որ 63-ից բարձր և հաշմանդամություն ունեցող բազմաթիվ քաղաքացիներ շարունակում են ունենալ մասնագիտական բարձր ներուժ:

Ո՞վ կկարողանա աջակցություն ստանալ

Նախագծի համաձայն՝ պետական ​​աջակցություն կտրամադրվի այն գործատուներին, որոնք աշխատանքային պայմանագիր կկնքեն հաշմանդամություն ունեցող անձի կամ 63 տարեկանից բարձր քաղաքացու հետ՝ առնվազն 3-6 ամիս ժամկետով:

Բացառություններ կլինեն հանրային ​​ծառայություն իրականացնող մարմինները` այսինքն պետական մարմինները։

Աշխատանքը կարող է լինել լրիվ կամ կես դրույքով:

Ի՞նչ վճարումներ են նախատեսվում

Գործատուներին առաջարկվում է եռամսյակային հիմունքներով փոխհատուցել աշխատողի աշխատավարձից վճարված եկամտային հարկի մի մասը. աշխատանքի առաջին երեք ամիսների համար՝ եկամտային հարկի գումարի 50%-ը, բայց ոչ ավելի, քան ամսական 25,000 դրամը, իսկ 4-6-րդ ամիսների համար՝ եկամտային հարկի գումարի 100%-ը, բայց ոչ ավելի, քան ամսական 50,000 դրամ:

Եթե փոխհատուցման ժամկետի ավարտից հետո զբաղվածությունը շարունակվի, մեկ տարին լրանալուց հետո գործատուն կստանա միանվագ 100,000 դրամ աջակցություն:

Ծրագրի ֆինանսավորում

Նախատեսվում է ծրագիրը 2027 թ.-ին իրականացնել 200 շահառուի զբաղվածության ապահովման համար, որի դեպքում ֆինանսական միջոցների ծախսը 2027թ.-ին կկազմի շուրջ 45 միլիոն դրամ գումար։

Մասնավորապես, գործատուին տրամադրվող եկամտային հարկի փոխհատուցման չափը 1 անձի համար 6 ամսվա հաշվարկով կկազմի 225 հազար դրամ, իսկ 12 ամիս աշխատանքային հարաբերությունները շարունակվելու դեպքում՝ կտրամադրվի ևս 100 հազար դրամ։

Աշխատանքի նախարարությունը նշում է, որ ծրագրի իրականացումը պետական ​​բյուջեից լրացուցիչ ծախսեր չի պահանջի. ֆինանսավորումը նախատեսվում է ապահովել նախարարության 2027–2029 թվականների բյուջեի սահմաններում միջոցների օպտիմալացման միջոցով: