ԱԺ–ն ընդունեց խորհրդարանի արձակումը թույլ չտվող օրինագիծը (ԼՐԱՑՎԱԾ)

ԵՐԵՎԱՆ, 2 հոկտեմբերի. /ԱՌԿԱ/. ՀՀ ԱԺ–ն երեքշաբթի արտահերթ նիստում երկրորդ և վերջին ընթերցմամբ ընդունեց «Ազգային ժողովի կանոնակարգի մասին» օրենքում նախատեսված փոփոխությունները, որոնք թույլ կտան պատգամավորներին ապահովագրվել խորհրդարանի հնարավոր արձակումից։ 

Սկզբում օրենքում նախատեսված փոփոխությունները վերաբերում էին միայն կառավարության դրական եզրակացությունը ստացած օրինագծերի քննարկման ժամանակ ԱԺ–ի նիստերում կառավարության ներկայացուցչի պարտադիր ներկայության անհրաժեշտությանը։ Սակայն ինչպես նշեց օրինագծի հեղինակներից մեկը, ԱԺ փոխխոսնակ Արփինե Հովհաննիսյանը, առաջին ընթերցումից հետո ներկայացվել են պատգամավորների առաջարկներ, որոնք ևս ներառվել են օրինագծում։

Քվեարկության արդյունքում ԱԺ–ն ընդունեց բոլոր առաջարկած փոփոխությունները միանգամից երկու ընթերցումներում` այդ կերպ վերջնականորեն հաստատելով բոլոր առաջարկած փոփոխությունները։ 

Օրինագծի ընդունման փաստը հաստատվել է ԱԺ–ի կայքում հրապարակված արձանագրության մեջ։

Ըստ փոփոխությունների, եթե ԱԺ նիստը չի կարող անցկացվել քվորումի բացակայության պատճառով կամ ստեղծվում են խոչընդոտներ նիստին պատգամավորների մասնակցության համար, ապա առաջարկվում է դադարեցնել նիստն ու շարունակել խոչընդոտող հանգամանքների վերացումից հետո։ Ինչպես կարծում են օրենքի հակառակորդները, այդ կերպ ՀՀԿ–ն և օրինագծին աջակցող քաղաքական ուժերը փորձում են ապահովագրվել խորհրդարանի հնարավոր արձակումից և ԱԺ արտահերթ ընտրությունների անցկացումից։ Խնդիրն այն է, որ ըստ ԱԺ կանոնակարգի, եթե պատգամավորները երկու անգամ չքվեարկեն վարչապետի թեկնածուի օգտին, ապա ԱԺ–ն արձակվում է օրենքի ուժով։ 

Պատգամավորները մասնակցել են քվեարկությանը տեխնիկական հնարավորությունների բացակայության դեպքում։ «Ելք» դաշինքի պատգամավոր Լենա Նազարյանն արտահերթ նիստից առաջ հավաքել էր պատգամավորների քարտերը, որոնցով նրանք միանում են քվեարկության էլեկտրոնային համակարգին։ Միաժամանակ, խորհրդարանը չապահովեց ուղիղ եթեր և ձայն ԱԺ նիստերի դահլիճից։
Օրինագծին «կողմ» քվեարկեցին ՀՀԿ, «Ծառուկյան» և ՀՅԴ խմբակցությունները, դեմ էր միայն «Ելք» խմբակցությունը։–0–