Հռոմի Ֆրանցիսկոս պապը ժամանեց Հայաստան
ԵՐԵՎԱՆ, 24 հունիսի. /ԱՌԿԱ/. Հռոմի Պապը սկսել է ուխտագնացությունը Հայաստան` քրիստոնեությունը որպես պետական կրոն ընդունած առաջին երկիր:
Սրբազան Քահանայապետը րոպեներ առաջ ժամանել է Երևանի միջազգային «Զվարթնոց» օդանավակայան, որտեղ նրան դիմավորել են ՀՀ նախագահ Սերժ Սարգսյանը`տիկնոջ Ռիտա Սարգսյանի հետ, և Ամենայն Հայոց Գարեգին Բ Կաթողիկոսը։
Երեխաները ողջունել են Հռոմի Պապին լավաշով և ծիրանով: Ինքնաթիռի սանդուղքի շուրջ պատվո պահակախումբ էր կանգնած:
Օդանավակայանից Պոնտիֆիկոսը կմեկնի Մայր Աթոռ Սուրբ Էջմիածին: Այնտեղ նա կաղոթի և ողջույնի խոսք կհղի Ամենայն Հայոց Գարեգին Բ Կաթողիկոսին:
Նույն օրը երեկոյան նախագահական նստավայրում Հռոմի Սրբազան Քահանայապետ Ֆրանցիսկոս Պապը հանդիպում կունենա ՀՀ նախագահի, քաղաքացիական իշխանությունների և դիվանագիտական կորպուսի հետ, որոնց կդիմի ուղերձով: -0-
