Հինգաստղանի հյուրանոցային համալիր կհայտնվի Հայաստանի ԱԳՆ նախկին շենքի տեղում
ԵՐԵՎԱՆ, 15 դեկտեմբերի. /ԱՌԿԱ/. Հինգաստղանի հյուրանոցային համալիր կհայտնվի Հայաստանի ԱԳՆ նախկին շենքի տեղում, հինգշաբթի խորհրդարանի արտահերթ նիստում ասաց Հայաստանի պետգույքի կառավարման վարչության պետ Արման Սահակյանը։
«Պայմանագրում հստակ նշված է, որ այնտեղ պետք է կառուցվի հինգաստղանի բրենդային հյուրանոցային համալիր` միջազգային չափանիշներին համապատասխան։ Եթե փոփոխություններ լինեն, մենք կտեղեկացնենք»,– ասաց Սահակյանը։
Ավելի վաղ հաղորդվել էր, որ արգենտինահայ գործարար Էդուարդո Էռնեկյանը հրահանգել է այդ տարածքում միջազգային հայտնի ապրանքանիշի հյուրանոցային համալիր կառուցել` պահպանելով շենքի պատմամշակութային և արտաքին տեսքը։ Այնուամենայնիվ, մի ժամանակ լուրեր էին պտտվում, թե ԱԳՆ նախկին շենքում թանգարան է բացվելու։ Հայաստանի մի շարք գործիչներ կտրականապես դեմ էին այդ շենքի օտարմանը։
Կառավարական թիվ 2 շենքը, որտեղ նախկինում գտնվում էր հայկական արտաքին քաղաքական գերատեսչությունը, 2012 թվականին 51.27 մլն դոլարով վաճառվեց «Տանգո» շինարարական ընկերությանը, որը պատկանում է հայազգի գործարար Էդուարդո Էռնեկյանին։ -0-
