ՀՀ–ում 2027թ․–ից կարգելվի միանգամյա օգտագործման պոլիէթիլենային տոպրակների վաճառքը․ ԱԺ–ն ընդունեց օրենքի փոփոխությունները
ԵՐԵՎԱՆ, 25 մարտի․/ԱՌԿԱ/․ 2027 թվականի հունվարի 1-ից Հայաստանում ուժի մեջ կմտնի միանգամյա օգտագործման պոլիէթիլենային տոպրակների վաճառքի, ինչպես նաև առևտրի և հանրային սննդի օբյեկտներում դրանց օգտագործման արգելքը:
ԱԺ–ն այսօր երկրորդ և վերջնական ընթերցմամբ ընդունեց «Առևտրի և ծառայությունների մասին» ՀՀ օրենքում և մի շարք հարակից օրենքներում համապատասխան փոփոխությունները։
Արգելքը կգործի նաև շարժական առևտրի կետերի, տոնավաճառների և մանրածախ առևտրի նկատմամբ: Բացառությունը տարածվում է ապրանքների կշռման և փաթեթավորման համար նախատեսված տոպրակների, ինչպես նաև երկրորդային հումքից պատրաստված աղբի տոպրակների վրա:
Բացի այդ, կարգելվեն նաև 50 միկրոնից ավելի հաստություն ունեցող պոլիէթիլենային տոպրակները: Որպես այլընտրանք առաջարկվում է թղթից և կտորից պատրաստված բազմակի օգտագործման տոպրակների կիրառումը:
Փոփոխություններով նախատեսվում է նաև նշված օբյեկտներում միանգամյա օգտագործման պլաստիկե և պենոպոլիստիրոլե տարաների ու սպասքի վաճառքի և օգտագործման արգելք:
Արգելքները խախտած տնտեսվարող սուբյեկտները կենթարկվեն վարչական պատասխանատվության. առաջին խախտման դեպքում՝ նախազգուշացում, կրկնվելու դեպքում՝ տուգանք 100-150 հազար դրամի չափով: Ներկայումս տուգանքը կազմում է 30-100 հազար դրամ:
2022 թվականի հունվարի 1-ից Հայաստանում գործում է առևտրի օբյեկտներում մինչև 50 միկրոն հաստությամբ պոլիէթիլենային տոպրակների օգտագործման արգելքը՝ բացառությամբ ապրանքների կշռման համար նախատեսված՝ երկրորդային հումքից պատրաստված տոպրակների:
