ՀՀ քաղաքացիները պետք է թվային գրանցում անցնեն ՌԴ մուտք գործելու համար
ԵՐԵՎԱՆ, 27 մայիսի․/ԱՌԿԱ/․ Այն երկրների քաղաքացիները, որոնք իրավունք ունեն Ռուսաստան մուտք գործել առանց վիզայի, հունիսի 30-ից պետք է նախնական թվային գրանցում անցնեն Госуслуги RuID հավելվածի միջոցով և ստանան QR կոդ՝ սահմանին ներկայացնելու համար։ Այս մասին հաղորդում է «Ռոսիյսկայա գազետան»։
Դա պետք է արվի Ռուսաստան մուտք գործելուց 72 ժամ առաջ։
«Գրանցվելու համար անհրաժեշտ է հավելվածում ստեղծել անձնական հաշիվ, վերբեռնել լուսանկար և անձնական տվյալներ, ինչպես նաև նշել ժամանման նախատեսված ամսաթվերը։ Արտակարգ դեպքերում՝ հիվանդություն, ազգականի մահ, դիմումը կարող է ներկայացվել ժամանումից առնվազն 4 ժամ առաջ։ Նորամուծությունը վերաբերում է Ռուսաստանի Դաշնության բոլոր մուտքի կետերին», - պարզաբանել է Ռուսաստանի տուրիստական արդյունաբերության միության փոխնախագահ Գեորգի Մոխովը։
