Հայաստանում ևս մի մարդ է մահացել «խոզի գրիպից». ԱՆ
ԵՐԵՎԱՆ, 13 հունվարի. /ԱՌԿԱ/. Հայաստանում ևս մի մարդ է մահացել H1N1վիրուսից, «Նովոստի–Արմենիա» գործակալությանն ասել է ՀՀ առողջապահության նախարարության պաշտոնական ներկայացուցիչ Անահիտ Հայթայանը։
«60–ամյա տղամարդը հիվանդ է եղել նախորդ տարվա դեկտեմբերի 28–ից և զբաղվել է ինքնաբուժությամբ։ Միայն հունվարի 4–ին է տեղափոխվել «Էրեբունի» բժշկական կենտրոն` ծանր վիճակում։ Հիվանդությունն անուշադրություն էր մատնված», – ասել է Հայթայանը։
Նա կրկին հորդորել է Հայաստանի բնակչությանը խուճապի չմատնվել, սակայն լինել զգոն և հիվանդության առաջին ախտանշանների դեպքում դիմել բժշկի։
ՀՀ ԱՆ հերքում է «խոզի գրիպից» ծննդկանի մահվան փաստը >>
Ինչպես նշվում է ՀՀ ԱՆ մամուլի հաղորդագրության մեջ, , ՀՀ առողջապահության նախարարությունն ու համակարգն աշխատում են արտակարգ ռեժիմով։ Աշխատանքներն առ այսօր տարվում են երկու ուղղությամբ` կանխարգելիչ և բուժական։ Նախարարությանը հաջողվեց բարձրացնել մարդկանց զգոնությունը` ինչի վկայությունն է դիմելիության մեծացումը։
Այս պահին հիվանդանոցների վերակենդանացման բաժանմունքներում բուժվում է 81 մարդ, որոնցից 14–ին միացված են արհեստական շնչառության սարքեր։
«Բոլոր այս հիվանդները կամ ժամանակին չեն դիմել բժշկին կամ ունեն քրոնիկ որևէ հիվանդություն։ Նրանց բուժման ընթացքը գլխավոր և առաջատար մասնագետների, անձամբ նախարարի ամենօրյա ուշադրության կենտրոնում է»,– նշվում է հաղորդագրության մեջ։
Հունվարի 12–ին ժամը 20։00–ի դրությամբ ՍՇՎ–ով հիվանդների ընդհանուր թիվը կազմում է 799` հունվարի 11–ին ժամը 20։00–ի դրությամբ գրանցված 855–ի դիմաց։ Հանրապետությունում մահացել է տասը մարդ, որոնց մոտ հաստատվել է H1N1 վիրուսը։–0–
