Հայաստանն ու Բուլղարիան կքննարկեն ուղիղ ավիահաղորդակցության հաստատման հնարավորությունը
12.03.2019,
21:20
Հայաստանն ու Բուլղարիան կքննարկեն ուղիղ ավիահաղորդակցության հաստատման հնարավորությունը։
ԵՐԵՎԱՆ, 12 մարտի./ԱՌԿԱ/. Հայաստանն ու Բուլղարիան երկկողմ միջկառավարական հանձնաժողովի նիստի շրջանակում կքննարկեն ուղիղ ավիահաղորդակցության հաստատման հնարավորությունը, երեքշաբթի ասաց Բուլղարիայի էկոնոմիկայի փոխնախարար Ալեքսանդր Մանոլևը հայ–բուլղարական գործարար համաժողովի ժամանակ։
«Մեր թռիչքը Սոֆիայից դեպի Երևան տևեց 2 ժամ 15 րոպե։ Գլոբալ աշխարհում դա նշանակում է, որ մենք ավելի քան մտերիմ հարևաններ ենք։ Սակայն, ցավոք, յուրաքանչյուր մարդուց, ով ցանկանա ճամփորդել այս ուղղությամբ, կպահանջվի 6 ժամ, քանի որ մենք չունենք ուղիղ ավիահաղորդակցություն», – ասաց նա։
Փոխնախարարի խոսքով, կարևոր է, որպեսզի լինեն մարդիկ, ովքեր կցանկանան օգտվել այդ ուղղությունից։
«Հուսով եմ, որ այստեղ կստորագրվեն մի շարք պայմանագրեր, որոնք հիմք կդառնան գործարարների և քաղաքացիների միջև ավելի մեծ թվով այցելությունների և հանդիպումների համար ։ Եթե դրա հետ մեկտեղ մենք շարունակենք խրախուսել տուրիստական փոխանակումը երկրների միջև, ապա վստահ եմ, որ ոչ հեռավոր ապագայում կունենանք ուղիղ օդային կապ», – ասաց նա։–0–