Լարսում սաստիկ բուք է. ռուսական կողմում կան կուտակված 90 բեռնատար և 20 մարդատար ավտոմեքենաներ (ՎԻԴԵՈ)
ԵՐԵՎԱՆ, 31 հունվարի./ԱՌԿԱ/. Այս պահին սաստիկ բուք է Լարսի անցակետում։
Ինչպես հաղորդում է ՀՀ ԱԻ նախարարությունը, Վրաստանի ՆԳՆ ԱԻ դեպարտամենտից և ՌԴ ԱԻՆ Հյուսիսային Օսիայի Ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա-Լարս ավտոճանապարհը փակ է բոլոր տիպի տրանսպորտային միջոցների համար:
«ՌԴ ԱԻՆ Հյուսիսային Օսիայի Ճգնաժամային կառավարման կենտրոնից ստացված տեղեկատվության համաձայն՝ ռուսական կողմում կան կուտակված 90 բեռնատար և 20 մարդատար ավտոմեքենաներ», – նշվում է գերատեսչության հաղորդագրության մեջ:
Մասնավորապես, հունվարի 31-ին՝ ժամը 17:30-ի դրությամբ, Մցխեթա-Ստեփանծմինդա-Լարս ավտոճանապարհին տեղում է առատ ձյուն: Գուդաուրի- Կոբի ճանապարհահատվածում ձնահյուսի վտանգի պատճառով ավտոճանապարհը փակ է բոլոր տեսակի տրանսպորտային միջոցների համար։ Այս մասին հաղորդում է ՀՀ տարածքային կառավարման և ենթակառուցվածքների նախարարություն
Հասարակայնության հետ կապերի բաժինը։
«Նովոստի–Արմենիա» գործակալության ընթերցողներից մեկը տեսանյութ է ուղարկել Լարսից։–0–
