ՀՀ և ՌԴ ԱԳ նախարները քննարկել են Արցախում իրավիճակի կայունացմանն ուղղված քայլերը
ԵՐԵՎԱՆ, 30 դեկտեմբերի./ԱՌԿԱ/. Չորեքշաբթի կայացել է Ռուսաստանի Դաշնության և Հայաստանի Հանրապետության ԱԳ նախարարներ Սերգեյ Լավրովի և Արա Այվազյանի հեռախոսազրույցը: Այս մասին հաղորդվում է ՌԴ ԱԳՆ կայքում:
Հայաստանի և Ռուսաստանի արտաքին քաղաքական գերատեսչությունների ղեկավարների հեռախոսազրույցի առանցքում էին նաև հայ-ռուսական օրակարգի մի շարք հարցեր։ Այս առնչությամբ երկուստեք գոհունակությամբ ընդգծվեց երկկողմ դաշնակցային փոխգործակցության բարձր դինամիկան՝ կարևորելով վերջինիս առաջմղումը գալիք տարում:
Ինչպես հաղորդում է ՀՀ ԱԳՆ մամուլի ծառայությունը, ի շարունակություն օրերս կայացած զրույցի՝ ԱԳ նախարարները մտքեր փոխանակեցին նաև տարածաշրջանային խաղաղության, կայունության և անվտանգության հարցերի շուրջ, քննարկեցին ԼՂ հակամարտության գոտում կրակի դադարեցման ռեժիմի պահպանման և Արցախում իրավիճակի կայունացմանն ուղղված քայլերը։ -0-
