ՀՀ և Ադրբեջանի ԱԳ նախարարներն առաջիկայում կհանդիպեն
ԵՐԵՎԱՆ, 6 սեպտեմբերի. /ԱՌԿԱ/. Հայաստանի և Ադրբեջանի ԱԳ նախարարների հանդիպումը ղարաբաղյան կարգավորման շուրջ կանցկացվի առաջիկայում, ուրբաթ լրագրողներին ասաց Հայաստանի արտաքին գործերի նախարար Զոհրաբ Մնացականյանը։
«Հանդիպումն արդեն ծրագրված է, այն շուտով կկայանա, բայց կա պայմանավորվածություն, որ ամսաթիվը և անցկացման վայրը հրապարակվեն համատեղ, և ես հակված եմ պահպանելու այդ սկզբունքը»,– ասաց նախարարը։
Մնացականյանի խոսքով, հայկական կողմը բազմիցս ասել է խաղաղ կարգավորման անհրաժեշտության մասին, և ԱԳՆ ղեկավարների ու պետությունների ղեկավարների ակտիվ հանդիպումների թիվը վկայում է այդ գերակայության մասին։
Նա նշեց, որ բանակցությունները տարվում են սեղանին բազմաթիվ պարամետրերով դրված շփման եզրեր գտնելու ուղղությամբ` առավելագույնս համաչափ որոշման հասնելու համար։
«Անհնար է, որ կողմերից մեկն ունենա մաքսիմալիստական ակնկալիքներ, և դրանք արդարանան։ Անհրաժեշտ է հավասարակշռություն գտնել»,– ասաց Մնացականյանը»
Նա նշեց, որ հակամարտությունը երկար պատմություն ունի, և այդ համատեքստում ԵԱՀԿ Մինսկի խմբի ձևաչափը երկխոսության անցկացման առավելագույն հնարավորություններն ունի։ -0-
