Հայաստանը նպատակ ունի ընդլայնել համագործակցությունը ԱՄՆ-ի հետ առևտրի և այլ ոլորտներում. Փաշինյանը՝ Թրամփին
ԵՐԵՎԱՆ, 4 հուլիսի․/ԱՌԿԱ/․ ՀՀ վարչապետ Նիկոլ Փաշինյանը շնորհավորական ուղերձ է հղել ԱՄՆ նախագահ Դոնալդ Թրամփին և Ամերիկայի ժողովրդին ազգային տոնի՝ Անկախության օրվա կապակցությամբ։
«Հայաստանը մեծապես կարևորում է ԱՄՆ-ի հետ ռազմավարական գործընկերության խորացումը և փոխադարձ հետաքրքրություն ներկայացնող բոլոր, ներառյալ՝ առևտրի, բարձր տեխնոլոգիաների, էներգետիկայի, հանքարդյունաբերության, տրանսպորտի ու ենթակառուցվածքների ոլորտներում համագործակցության հետագա ընդլայնումը: Վստահ եմ, որ համատեղ ջանքերով էլ ավելի բարձր մակարդակի կհասցնենք մեր հարաբերությունները՝ ի բարօրություն Հայաստանի և Միացյալ Նահանգների ժողովուրդների»,-ասվում է ուղերձում։
Փաշինյանը բարձր է գնահատել Թրամփի տեսլականը՝ վերջ դնել հակամարտություններին և խաղաղություն հաստատել ամբողջ աշխարհում։
«Լիահույս եմ, որ Ձեր առաջնորդության ներքո Միացյալ Նահանգները հիմնարար ներդրում կունենա Հարավային Կովկասում երկար սպասված խաղաղություն ու կայունություն հաստատելու և բարգավաճում ապահովելու գործում»,-նշվում է շնորհավորական ուղերձում։
