Հայաստանը դեռևս այն ճանապարհային կետում չէ, որպեսզի ռուսական ռազմաբազան երկրի տեսադաշտը փակելիս լինի․ Փաշինյան
ԵՐԵՎԱՆ, 5 մարտի․/ԱՌԿԱ/․ Հայաստանը, բարեբախտաբար, թե դժբախտաբար, դեռևս այն ճանապարհային կետում չի, որպեսզի ռուսական ռազմաբազան երկրի տեսադաշտը փակելիս լինի։
Այս մասին այսօր ճեպազրույցի ժամանակ հայտարարել է ՀՀ վարչապետ Նիկոլ Փաշինյանը։
«Մենք խնդիր չունենք, չենք ունեցել և չենք ունենալու Ռուսաստանի հետ հարաբերություններ վատացնելու, մենք խնդիր չենք ունեցել, չունենք և չենք ունենալու Ռուսաստանի շահերին վնասելու։ Մենք ունեցել ենք խնդիր, ունենք և միշտ կունենանք առաջնորդվել բացառապես Հայաստանի Հանրապետության պետական շահերով», - ասաց Փաշինյանը։
Վարչապետը հայտնեց, որ երբ տեսնեն, որ ռուսական ռազմաբազան փակում է Հայաստանի տեսադաշտը, այդ ժամանակ կմտածեն՝ ինչպես շարժվել, որպեսզի տեսադաշտի խնդիր չունենան։
Փաշինյանը հիշեցրեց նաև, որ Հայաստանն ընդունել է Եվրամիությանը անդամագրվելու գործընթաց սկսելու մասին օրենք։
