ՀԱՊԿ–ից դուրս գալու հարց ԱԳՆ օրակարգում չի դրվել․ ԱԳ փոխնախարար
ԵՐԵՎԱՆ, 26 նոյեմբերի․/ԱՌԿԱ/․ ԱԳ փոխնախարար Մնացական Սաֆարյանը ԱԺ-ում լրագրողների հետ ճեպազրույցում անդրադարձել է Հայաստանի՝ ՀԱՊԿ-ից դուրս գալու հարցին և հայտնել, որ ԱԳՆ օրակարգում այն չկա։
«Հայաստանը վարում է իր արտաքին քաղաքականությունը շահերի հիման վրա՝ ըստ ձևավորվող իրավիճակի։ Ըստ կոնկրետ իրավիճակի՝ Հայաստանն ընդունում է որոշումներ»,-նշեց փոխնախարարը։
Սաֆարյանը խոսեց նաև ՀԱՊԿ գագաթնաժողովին Հայաստանի չմասնակցելու մասին՝ նշելով, որ ՀԱՊԿ-ի հետ Հայաստանի ձևաչափը և քաղաքականությունն արդեն հայտարարվել է։
«Մենք դրա մասին արդեն որոշ ժամանակ առաջ հայտարարել ենք․ չենք մասնակցում, բայց չենք խոչընդոտում որոշումների, փաստաթղթերի ընդունմանը»,- ասաց Սաֆարյանը։
Սաֆարյանի խոսքով՝ այս փուլում Հայաստանի քաղաքականությունը այդպիսինն է, և եթե հավելյալ դիրքորոշումներ կամ քայլեր լինեն, դրա մասին կտեղեկացվի։
Հիշեցնենք, որ ավելի վաղ հայտնի էր դարձել, որ Հայաստանը չի մասնակցելու նոյեմբերի 27-ին Ղրղզստանում կայանալիք ՀԱՊԿ գագաթնաժողովին։
