Թուրքիան ակնհայտ կերպով աջակցում է «Իսլամական պետությանը».Հունաստանի պաշտպանության նախարար
ԵՐԵՎԱՆ, 16 դեկտեմբերի. /ԱՌԿԱ/. Անկարան ակնհայտ կերպով աջակցում է «Իսլամական պետությանը», Երևանում իր հայ գործընկեր Սեյրան Օհանյանի հետ կայացած համատեղ ճեպազրույցի ժամանակ հայտարարել է Հունաստանի ազգային պաշտպանության նախարար Պանայոտիս Կամմենոսը։
«Թուրքիայում իրականացվում է նավթի, զենքի, թմրանյութերի, մարդկանց անօրինական առևտուր և տեղափոխություն։ Անօրինական ճանապարհով ստացված ողջ գումարը ծախսվում է ահաբեկչությանն աջակցելու համար։ Անկարան ակնհայտ կերպով աջակցում է «Իսլամական պետությանը»», – հայտարարել է Կամմենոսը, հաղորդում է «Նովոստի–Արմենիա» գործակալությունը։
Նրա խոսքով` Թուրքիան պարբերաբար խախտում է Հունաստանի օդային և ջրային սահմանները։
«Եթե Թուրքիան ցանկանում է համապատասխանել միջազգային նորմերին, ապա պետք է դադարեցնի նման գործողությունները», – ընդգծեց նախարարը։–0–
