Չեխիան սպառազինություն չի վաճառել Ադրբեջանին. Սենատի նախագահ
ԵՐԵՎԱՆ, 4 հոկտեմբերի. /ԱՌԿԱ/. Չեխիայի Սենատի նախագահ Միլան Շտեխը ՀՀ ԱԺ–ում կայացած ճեպազրույցի ժամանակ հերքել է խոսակցություններն այն մասին, թե Չեխիան սպառազինություն է վաճառել Ադրբեջանին։
«Վստահ եմ, որ հայկական ԶԼՄ–ները ևս անդրադարձել են այս թեմային, ցանկանում եմ վստահեցնել, որ Չեխիայի կառավարությունը զենք չի վաճառել Ադրբեջանին։ Չեխիան հարգում է զենքի վաճառքի էմբարգոն, որը գործում է հակամարտող երկրների հարցում», – հայտարարեց Շտեխն ու ավելացրեց, որ Չեխիայում չգիտեն, թե ինչպես է չեխական զենքը հայտնվել Ադրբեջանում։
«Չեխիայի կառավարությունը համաձայնություն չի տվել», – ավելացրեց նա։
Ավելի վաղ razm.info կայքը հաղորդել էր, որ Ադրբեջանի ԶՈւ–ի մասշտաբային զորավարժություններին (որոնք մեկնարկել էին սեպտեմբերի 8–ին) մեկնող շարասյան տեսանյութում երևում են «Dana» հրետանային ինքնագնաց կայանքներն ու RM-70 համազարկային կրակի ռեակտիվ համակարգերը։ Երկու մոդելներն էլ արտադրվում են Չեխիայում։–0–
