Ադրբեջանում անցկացվող զորավարժությունները չեն նպաստում տարածաշրջանում անվտանգության և կայունության մթնոլորտի ամրապնդմանը. ՀՀ ԱԳՆ
ԵՐԵՎԱՆ, 13 մարտի. /ԱՌԿԱ/. Ադրբեջանում անցկացվող զորավարժությունները չեն նպաստում տարածաշրջանում անվտանգության և կայունության մթնոլորտի ամրապնդմանը, չորեքշաբթի հայտարարեց ՀՀ արտաքին գործերի նախարար Զոհրաբ Մնացականյանը:
«Ադրբեջանում առանց համապատասխան ծանուցման անցկացվող լայնամասշտաբ հարձակողական զորավարժությունները, որոնք խախտում են ԵԱՀԿ կողմից սահմանված միջազգային պարտավորությունները, չեն նպաստում տարածաշրջանում անվտանգության և կայունության մթնոլորտի ամրապնդմանը», - ասաց Մնացականյանը ԵԱՀԿ գործող նախագահ, Սլովայիայի արտաքին գործերի նախարար Միրոսլավ Լայչակի հետ համատեղ ճեպազրույցի ժամանակ:
Նա նշել է նաև, որ տարածաշրջանում խաղաղության և կայունության ապահովումը ԵԱՀԿ նախագահության շրջանում Սլովակիայի աշխատանքի հիմնական առաջնահերթություններից է:
Մարտի 11-ից 15 Ադրբեջանի ԶՈՒ-ն լայնածավալ զորավարժություններ է անցկացնում, որոնցում ներգրավված է մինչև 10 հազար զինվորական, մինչև 500 միավոր տանկ, զրահապատ տեխնիկա, այդ թվում` ավտոմոբիլային և հատուկ նշանակության, տարբեր տրամաչափի մինչև 300 հրթիռահրետանային համակարգեր, համազարկային կրակի ռեակտիվ համակարգեր և ականանետեր, մինչև 20 միավոր տարբեր նշանակության բանակային և ռազմաճակատային ավիացիա։–0–
