Լեռնային Ղարաբաղի վերջնական կարգավիճակը պետք է որոշվի բանակցությունների միջոցով Ադրբեջանի և Հայաստանի միջև. Զախարովա
ԵՐԵՎԱՆ, 9 օգոստոսի./ԱՌԿԱ/. Ռուսաստանն այն կարծիքին է, որ Լեռնային Ղարաբաղի վերջնական կարգավիճակը պետք է որոշվի բանակցությունների միջոցով Ադրբեջանի և Հայաստանի միջև, հայտարարել է ՌԴ ԱԳՆ ներկայացուցիչ Մարիա Զախարովան ամենշաբաթյա ճեպազրույցի ժամանակ։
«Մենք գոհունակությամբ նշում ենք, որ Հայաստանի և Ադրբեջանի շփման գծում այսօր գրանցվում է հարաբերական հանգստություն։ Միաժամանակ, մեզ մտահոգում է այն, որ կողմերը տարբեր առիթներով շարունակում են ներկայացնել փոխադարձ մեղադրանքներ», – նշել է նա։
Զախարովան ընդգծել է, որ նման հռետորաբանությունը չի համապատասխանում բանակցային գործընթացի համար բարենպաստ պայմանների ձևավորմանն ու համապատասխանաբար` հակամարտության կարգավորման փոխզիջումային տարբերակներ որոնելուն։
«Ռուսաստանն այն կարծիքին է, որ Լեռնային Ղարաբաղի վերջնական կարգավիճակը պետք է որոշվի բանակցությունների միջոցով Ադրբեջանի և Հայաստանի միջև», – նշել է ՌԴ ԱԳՆ ներկայացուցիչը։
Միաժամանակ նշվել է, որ հաշվի առնելով Բաքվի և Երևանի հետ Մոսկվայի սերտ հարաբերությունները` Ռուսաստան, որպես ԵԱՀԿ ՄԽ համանախագահ, նպատակաուղղված է աջակցել` խաղաղ գործընթացի համակողմանի առաջխաղացման նպատակով։–0–
