Կրեմլ. Պուտին–Ալիև–Փաշինյան բանակցությունների հստակ ամսաթիվ որոշված չէ
ԵՐԵՎԱՆ, 8 նոյեմբերի./ԱՌԿԱ/. ՌԴ նախագահ Վլադիմիր Պուտինի, Ադրբեջանի առաջնորդ Իլհամ Ալիևի և ՀՀ վարչապետ Նիկոլ Փաշինյանի տեսակապի միջոցով բանակցությունների նախապատրաստական աշխատանքն ընթանում է, բայց հստակ ամսաթիվը դեռ չի որոշվել։ Այս մասին այսօր լրագրողներին ասել է ՌԴ նախագահի մամուլի քարտուղար Դմիտրի Պեսկովը, հաղորդում է ՏԱՍՍ–ը։
«Հստակեցնում եմ Պուտինի, Ալիևի և Փաշինյանի տեսակապի թեմայի շուրջ, մենք հաստատում ենք, որ աշխատանք է տարվում այդ հանդիպումը նախապատրաստելու ուղղությամբ։ Բայց այստեղ ուզում ենք նշել, որ դեռևս չկան հստակ պայմանավորվածություններ և ընկալում այն մասին, թե երբ այդ տեսակապը կարող է տեղի ունենալ։ Այդ աշխատանքը շարունակվում է», – նշել է նա։
Նախօրեին երեկոյան Հանրային հեռուստաընկերությանը տված հարցազրույցում ՀՀ վարչապետ Նիկոլ Փաշինյանը հայտարարել է, որ նոյեմբերի 9-ին ՌԴ և Ադրբեջանի նախագահների հետ հանդիպման պայմանավորվածություն այս պահին չկա։
Նախօրեին ավելի վաղ Կրեմլում հաստատել են հաջորդ շաբաթ Ռուսաստանի, Ադրբեջանի և Հայաստանի առաջնորդների եռակողմ հանդիպման անցկացման պլանները։ «Այո, իսկապես, նման հանդիպում նախապատրաստվում է, և այն նախապատրաստվում է տեսակոնֆերանսի ձևաչափում», – ասել է ՌԴ նախագահի մամուլի քարտուղար Դմիտրի Պեսկովը։
