ԵԱԶԲ–ն չի տեսնում ռիսկեր Հայաստանի պետական պարտքի մակարդակում և ակնկալում է, որ այն 2025թ․–ին կլինի ՀՆԱ–ի 51,5%–ի սահմաններում

ԵՐԵՎԱՆ, 18 դեկտեմբերի․/ԱՌԿԱ/․ ԵԱԶԲ վերլուծաբանները ներկա պահին և առաջիկա երեք տարիների կտրվածքով Հայաստանի պետական պարտքի մակարդակի հետ կապված ռիսկեր չեն տեսնում։ Այս մասին հայտարարեց ԵԱԶԲ վերլուծական աշխատանքների գծով տնօրինության ղեկավար Ալեքսեյ Կուզնեցովը։

«Մենք տեսնում ենք, որ 2020 թվականին Հայաստանի պետական պարտքը կազմում էր ՀՆԱ-ի 67%-ը։ Ի՞նչ տեղի ունեցավ և ի՞նչ ենք տեսնում հիմա։ Պետական պարտքը նվազել է մինչև ՀՆԱ-ի գրեթե 50%-ը։ Սա դրական դինամիկա է», - ասաց Կուզնեցովը։

Նրա խոսքով՝ հաշվի առնելով 2025 թվականին իրականացված փոխառությունները, մինչև տարեվերջ պետական պարտքը կարող է փոքր-ինչ աճել՝ կազմելով ՀՆԱ-ի շուրջ 51-51,5%։

«Այսինքն՝ չկա որևէ զգալի արագացում, և սկզբունքորեն դրա մակարդակը բավականին անվտանգ է։ Այո, նախատեսվում է պետական պարտքի մակարդակը հասցնել ՀՆԱ-ի 55%-ի և կայունացնել այն 50-55% միջակայքում։ Սա լիովին նորմալ աշխատանքային արդյունք է», - նշեց Կուզնեցովը։

Նա բերեց զարգացող տնտեսություն ունեցող երկրների օրինակը, որտեղ, վերջին տվյալների համաձայն, պետական պարտքի միջին մակարդակը ՀՆԱ-ի նկատմամբ կազմում է 95%։

2025 թվականի հոկտեմբերի 27-ին ՀՀ ֆինանսների նախարար Վահե Հովհաննիսյանը հայտարարեց, որ հայկական դրամի կանխատեսվող փոխարժեքի պայմաններում, միջնաժամկետ հեռանկարում պետական ​​պարտք–ՀՆԱ հարաբերակցությունը կկայունանա 50-60%-ի սահմաններում։ Մասնավորապես, այդ ցուցանիշը կհասնի 54%-ի և առաջիկա տարիներին կցուցաբերի նվազման միտում։

ԱՎԿ–ի տվյալներով, Հայաստանի համախառն պետական պարտքը 2025թ․–ի հոկտեմբերի 31–ի տվյալներով կազմել է 14,1 մլրդ դոլար՝ նվազելով 22․7 մլն դոլարով 2025թ․–ի սեպտեմբերի 30–ի համեմատ։