ՌԴ–ում հերքել են Հայաստանի երկաթուղին Ղազախստանին վաճառելու շուրջ բանակցությունները

ԵՐԵՎԱՆ, 1 ապրիլի․/ԱՌԿԱ/․ ՌԴ ԱԳՆ պաշտոնական ներկայացուցիչ Մարիա Զախարովան հերքել է այն տեղեկությունը, թե բանակցություններ են ընթանում Հայաստանի երկաթուղիների կառավարման գործառույթները Ղազախստանին փոխանցելու վերաբերյալ։

«Մարտի 30-ին Ռուսաստանի Դաշնության տրանսպորտի նախարար Անդրեյ Նիկիտինը հայտնել է, որ Մոսկվան ո՛չ Աստանայի, ո՛չ էլ Երևանի հետ բանակցություններ չի վարում Հայաստանի երկաթուղիների կառավարման կոնցեսիան Ղազախստանին փոխանցելու շուրջ։ Սա շատ կարևոր է հաշվի առնել, քանի որ հայտարարությունն արվել է պրոֆիլային գերատեսչության ղեկավարության մակարդակով», - չորեքշաբթի օրը կայացած ճեպազրույցում հայտարարել է Զախարովան՝ պատասխանելով այս թեմայով բարձր մակարդակով շփումների ժամկետների ըմբռնման և ռուսական կողմի համար նման սցենարի թույլատրելիության մասին հարցին։

Նա հիշեցրել է, որ 2008 թվականին Հայաստանի և «Ռուսական երկաթուղիներ» (РЖД) ԲԲԸ-ի միջև կնքված կոնցեսիոն պայմանագրի ժամկետը կազմում է 30 տարի՝ ևս 10 տարով երկարաձգելու հնարավորությամբ։

«Արդեն երկար տարիներ «Հարավկովկասյան երկաթուղի» ՓԲԸ-ն պատասխանատվությամբ կատարում է այս պայմանագրի դրույթները։ Ռուսական ներդրումները հանրապետական երկաթուղում կազմել են ավելի քան 30 մլրդ ռուբլի։ Ինչ վերաբերում է բարձր մակարդակով բանակցություններին, ապա դրանք, ավանդույթի համաձայն, մեկնաբանում է նախագահի աշխատակազմը», - ասել է Զախարովան։

Մոտ մեկ շաբաթ առաջ Հայաստանի վարչապետ Նիկոլ Փաշինյանը հայտնել էր, որ Ռուսաստանի նախագահ Վլադիմիր Պուտինի հետ քննարկել է Հայաստանում երկաթուղու հարցը։

Հայաստանի երկաթուղու մասին

Ավելի վաղ Փաշինյանը չէր բացառել Ռուսաստանի կողմից հայկական երկաթուղիների կառավարման իրավունքը մեկ այլ՝ Հայաստանի և Ռուսաստանի համար բարեկամ երկրի, մասնավորապես՝ Կատարին, ԱՄԷ-ին կամ Ղազախստանին վաճառելու հնարավորությունը։

Փաշինյանը հայտարարել էր, որ TRIPP նախագծի շրջանակում մի շարք երկրներ առաջարկում են երկաթուղային հաղորդակցություն հաստատել Նախիջևանի և Ադրբեջանի հիմնական տարածքի միջև՝ շրջանցելով Հայաստանը՝ մատնանշելով այն հանգամանքը, որ հայկական երկաթուղին գտնվում է ռուսական ընկերության կառավարման ներքո։ Նրա խոսքով՝ Ռուսաստանի կողմից հայկական երկաթուղու կառավարման պատճառով «Հայաստանը կորցնում է մրցակցային առավելությունը»։