Ներդրումային և ֆինանսական երկրորդ համաժողովը հետաձգվում է
ԵՐԵՎԱՆ, 2 մարտի․/ԱՌԿԱ/․ Կազմակերպչական հանձնաժողովը տեղեկացնում է, որ «Հնարավորությունների ժամանակը․ Հայաստանը՝ համաշխարհային շուկաների նոր ճարտարապետության մեջ» խորագրով Ներդրումային և ֆինանսական երկրորդ համաժողովը, որի անցկացումը նախատեսված էր 2026 թվականի մարտի 3-ին՝ Երևանի «Դվին» մյուզիք հոլում, հետաձգվում է։
Որոշումն ընդունվել է Մերձավոր Արևելքում ստեղծված լարված իրավիճակի պայմաններում, որը կարող է ռիսկեր առաջացնել միջոցառման մասնակիցների անվտանգության տեսանկյունից։ Բացի այդ, տարածաշրջանի մի շարք երկրների հետ միջազգային ավիահաղորդակցության սահմանափակումները դժվարացնում են արտերկրյա բանախոսների և պատվիրակությունների ժամանումը։
Համաժողովը միջազգային մասնագիտական հարթակ է, որը միավորում է պետական կառույցների, ֆինանսական հատվածի, ներդրումային համայնքի և արտասահմանյան գործընկերների ներկայացուցիչներին՝ նպատակ ունենալով խթանել մասնագիտական երկխոսությունը և քննարկել Հայաստանի դերը համաշխարհային ֆինանսական շուկաների նոր ճարտարապետության մեջ։ Ստեղծված պայմաններում հնարավոր չէ ապահովել հրավիրված բոլոր բանախոսների և պատվիրակությունների լիարժեք մասնակցությունը, ինչպես նաև միջոցառման բարձր կազմակերպչական չափանիշների պահպանումը։
Կազմակերպչական հանձնաժողովը ներողություն է խնդրում պատճառված անհարմարությունների համար և շնորհակալություն հայտնում գործընկերներին, մասնակիցներին և հրավիրյալներին ըմբռնման համար։
Համաժողովի նոր ամսաթվի մասին կտեղեկացվի լրացուցիչ։ Մասնակիցների գրանցումները կպահպանվեն և ուժի մեջ կմնան նաև նոր ամսաթվի դեպքում։
Համաժողովի մասին
Առաջին ներդրումային և ֆինանսական համաժողովը՝ «Հայաստանի կապիտալի շուկաները․ հայացք ապագային», անցկացվել է 2024 թվականին և համախմբել ավելի քան 500 մասնակից։ Freedom Broker Armenia-ի և ՀՀ էկոնոմիկայի նախարարության համատեղ կազմակերպմամբ համաժողովը դարձել է շուկայի առանցքային մասնակիցների փոխգործակցության առաջատար հարթակ՝ ներառյալ պետական մարմինները, բիզնեսի ներկայացուցիչները, լրատվամիջոցները և լայն հանրությունը։
Freedom Broker Armenia-ի մասին
Freedom Broker Armenia-ն (իրավաբանական անվանումը՝ ՍՊԸ «Ֆրիդոմ Ֆինանս Արմենիա») Հայաստանի Կենտրոնական բանկի կողմից լիցենզավորված ներդրումային ընկերություն է, որը ապահովում է մուտք տեղական և միջազգային ֆոնդային շուկաներ։ Ընկերությունն առաջարկում է ներդրումային և բրոքերային ծառայությունների ամբողջական փաթեթ՝ արժեթղթերով գործառնություններ, ֆոնդային ներդրումներ, մասնակցություն IPO-ներին, ինչպես նաև ինքնուրույն առևտուր առցանց հարթակի միջոցով։
Freedom Broker Armenia-ն հանդիսանում է միջազգային ֆինանսական Freedom Holding Corp. հոլդինգի մաս, որի բաժնետոմսերը շրջանառվում են NASDAQ բորսայում (FRHC տիկեր)։ Հոլդինգի շուկայական կապիտալիզացիան կազմում է 10,54 մլրդ ԱՄՆ դոլար, ակտիվները՝ 10,3 մլրդ դոլար (2025թ. սեպտեմբերի 30-ի դրությամբ)։ Խումբը ներկայացված է ԱՄՆ-ում, Եվրոպայում, ԱՊՀ երկրներում և Ասիայում, ունի ավելի քան 10 000 աշխատակից, 232 գրասենյակ և ավելի քան 6,1 մլն օգտատեր թվային էկոհամակարգում։
