ՀԾԿՀ-ն պատասխանել է «Տաշիր» խմբի փոխնախագահի՝ էլեկտրաէներգիայի սակագնի նվազեցման հնարավորության մասին գրառմանը

ԵՐԵՎԱՆ, 31 հոկտեմբեր․/ԱՌԿԱ/. «Տաշիր» խմբի փոխնախագահ Նարեկ Կարապետյանը սոցիալական ցանցերում գրել է Հայաստանի բնակիչների համար էլեկտրաէներգիայի սակագինը 3 դրամով նվազեցնելու հնարավորության մասին։

«Եկեք ներկայացնեմ, թե ինչպես լույսի սակագինը բնակչության համար կարող է իջնել 3 դրամ 1 կվտ-ի համար (հիշենք, որ սա առաջարկել ենք մինչև քաղաքական պրոցեսներում հայտնվելը): 2024թ-ին ունեցել ենք էլ էներգիայի մուտք մոտ 5մլրդ կվտ, որից` բնակչության գծով մուտքը` 2.130 մլրդ կվտ: Չնայած Քպ-ական կառավարիչ նշանակելուց հետո կորուստների շեշտակի աճ կա, հին իներցիայի շնորհիվ այս պահին կա 6 մլրդ դրամի ավելացած գումար Հէցում: Իջեցնում ենք միայն բնակչության համար սահմանված սակագինը, և էլ.էներգիայի սակագինը իջնում է շուրջ 3 դրամով 1 կվտ ի համար»,-գրել է նա Facebook-ի իր էջում։

Հանրային ծառայությունները կարգավորող մարմնի պատասխանը

ՀԾԿՀ-ն համաձայն չէր Նարեկ Կարապետյանի պնդման հետ՝ բնակչության համար էլեկտրաէներգիայի 3 դրամ սակագնի հնարավոր նվազեցումը համարելով անճշտություն։

«Իրենց կողմից բնակչության էլեկտրաէներգիայի սակագինը 3 դրամով իջեցնելու առաջարկ երբևէ ՀԾԿՀ-ին չի ներկայացվել։ Ինչպես արդեն նշել ենք, 2025 թվականի հունիս ամսվա ՀԷՑ-ի առաջարկը ընդամենը վերաբերել է 6 ամսում ձևավորված 3.6 մլրդ դրամ լրացուցիչ օգուտը նվազեցնելուն և, զուգահեռաբար, կատարված ներդրումները փոխհատուցելուն, ինչը բոլոր սպառողների էլեկտրաէներգիայի սակագնի վրա ազդում է ընդամենը 0.2 դրամով»,-ասվում է պատասխան տեքստում։

Հանձնաժողովը կարծում է, որ ինչպես 6 ամսում ձևավորված 3.6 մլրդ դրամի, այնպես էլ Նարեկ Կարապետյանի նշած՝ այս պահին 6 մլրդ դրամի լրացուցիչ օգուտը որևէ առնչություն չունի ՀԷՑ-ի աշխատանքի արդյունավետության հետ։

«Այս տարվա լրացուցիչ օգուտները կամ նախորդ տարիների վնասները ձևավորվել են բացառապես էլեկտրաէներգիայի արտադրության և սպառման կառուցվածքի պլանավորված և փաստացի մեծությունների տարբերության արդյունքում, որի հետ ՀԷՑ-ը որևէ առնչություն չունի»,-նշվում է հայտարարության մեջ։

Նշվում է, որ ՀԷՑ-ի կողմից պարբերաբար ՀԾԿՀ են ներկայացվել առաջարկներ, որոնք ընդունելու դեպքում սպառողների էլեկտրաէներգիայի սակագները կբարձրանային։ Մասնավորապես, 2024 թվականի սեպտեմբերին ՀԷՑ-ն առաջարկել էր մաքուր շահույթի նորման ավելացնել 2%-ով, որը չի ընդունվել ՀԾԿՀ-ի կողմից։ Եթե առաջարկն ընդունվեր, ապա բոլոր սպառողների էլեկտրաէներգիայի սակագինը կավելանար շուրջ 1.5 դրամով, իսկ միայն բնակչության սակագնի փոփոխության դեպքում՝ շուրջ 3 դրամով։

«Սպառողների էլեկտրաէներգիայի սակագների փոփոխությունը չի կարող իրականացվել միայն Նարեկ Կարապետյանի նշած՝ լրացուցիչ ձևավորված 6 մլրդ դրամ օգուտով, այլ կան բազմաթիվ այլ դրական և բացասական գործոններ։ Այս գործոնների գնահատման համար ինչպես յուրաքանչյուր տարի, այնպես էլ այս տարի՝ սեպտեմբերի 15-ից, ՀԾԿՀ-ն արդեն իսկ սկսել է ամբողջ համակարգի սակագների վերանայման գործընթաց, որի արդյունքներով տարեվերջին պարզ կլինի՝ սպառողի սակագնի փոփոխություն տեղի կունենա, թե՞ ոչ»,-ասվում է ՀԾԿՀ-ի պարզաբանման մեջ։

ՀԾԿՀ-ն կարծում է, որ եթե ՀԷՑ-ը ունենար սպառողների էլեկտրաէներգիայի սակագինը իջեցնելու ցանկություն, ապա ցանկացած պահի կարող էր առանց ՀԾԿՀ-ին դիմելու իջեցնել սպառողների գները՝ իր շահույթի հաշվին։

ՀԷՑ-ի նոր դիմումի մասին

Հոկտեմբերի 31-ին «Տաշիր կապիտալի» անունից ՀԾԿՀ-ին դիմում է ներկայացվել էլեկտրաէներգիայի սակագինը իջեցնելու համար։

Իրավաբան Գոհար Մելոյանի խոսքով՝ ՀԷՑ տնտեսագետների հաշվարկները ցույց են տալիս, որ մեծ հավանականություն կա սակագինը մոտավորապես 3 դրամի չափով իջեցնելը, ինչը բավականին մեծ թիվ է։ «Այնուամենայնիվ, իշխանությունները մանիպուլյացիաներ են անում այս հարցի շուրջ», - նշել է նա։