Հայաստանը ԵՄ–ից կստանա 200 մլն եվրո «Կայունության և աճի ծրագրի» 2–րդ փուլի ֆինանսավորման շրջանակում․ եվրահանձնակատար
ԵՐԵՎԱՆ, 19 սեպտեմբերի․/ԱՌԿԱ/․ Եվրոպական Միությունը Հայաստանին կտրամադրի ավելի քան 200 միլիոն եվրո «Կայունության և աճի» ծրագրի երկրորդ փուլի ֆինանսավորման շրջանակում, հայտարարեց Եվրոպական միության ընդլայնման հարցերով հանձնակատար Մարթա Կոսն այսօր Երևանում կայացած ասուլիսի ժամանակ։
«Սա վկայում է, որ Հայաստանը հետամուտ է բարեփոխումների օրակարգին և դրա իրականացմանը առանցքային ոլորտներում», - ասաց նա՝ հավելելով, որ միջոցները կուղղվեն բիզնեսի և տրանսպորտի զարգացմանը, ինչպես նաև խաղաղության գործընթացին։
Նա նշեց, որ սա իր առաջին այցն է Երևան:
«Տարածաշրջանը պատմական ժամանակաշրջան է ապրում, և առաջին անգամ հնարավորություն է ստեղծվել խաղաղություն բերելու Հարավային Կովկաս. սա է իմ այցի նպատակն ու պատճառը: Մենք կողմ ենք Հայաստանի հետ խաղաղ գործընկերությանը և պատրաստ ենք այն շարունակել: Եվրոպան հիմնված է խաղաղության վրա, Եվրոպան գործընկեր է խաղաղության հարցում, և թե՛ Հարավային Կովկասը, թե՛ Հայաստանը կարևոր մաս են կազմում այն փոփոխությունների, որոնք կփոխակերպեն իրավիճակը թե՛ Եվրոպայում, թե՛ Հարավային Կովկասում», - ընդգծեց Կոսը:
