Հասարակական տրանսպորտի ուղեվարձը չի թանկանա. Երևանի քաղաքապետ

ԵՐԵՎԱՆ, 28 մարտի. /ԱՌԿԱ/. Երևանի քաղաքապետ Տարոն Մարգարյանը,  անդրադառնալով տրանսպորտի սակագնի բարձրացման մասին վերջերս շրջանառվող խոսակցություններին, վստահեցրել է, որ նման որոշում չի կայացվել ու առաջիկայում չի նախատեսվում, հաղորդում է քաղաքապետարանի մամուլի ծառայությունը:

«Մենք պաշտոնապես հայտարարել ենք, որ մայրաքաղաքում հասարակական տրանսպորտի ուղեվարձի փոփոխության հարց չի քննարկվել և առաջիկայում էլ նման բան չի նախատեսվում»:,- ընդգծել է քաղաքապետը:

Քաղաքապետը նշել է, որ Երևանի բնակիչները կարող են անհոգ լինել, քանի որ ուղեվարձը մնալու է անփոփոխ, նշվում է Երևանի քաղաքապետարանի մամուլի ծառայության հաղորդագրությունում։

Երևանի հասարակական տրանսպորտի ուղեվարձը կազմում է 100 դրամ, բացի տրոլեյբուսներից, որոնց ուղեվարձը կազմում է 50 դրամ։ -0-