Արդյունաբերական արտադրանքի ծավալը Հայաստանում 2025թ․–ին ավելացել է 4,7%–ով՝ մինչև 3,33 տրլն դրամ

ԵՐԵՎԱՆ, 9 փետրվարի․/ԱՌԿԱ/․ Հայաստանում արդյունաբերական արտադրանքի ծավալը 2025 թվականին կազմել է 3 327 745.1 մլն դրամ (ընթացիկ գներով)՝ 2024 թվականի համեմատ աճելով 4,7%-ով։ Այս մասին են վկայում Հայաստանի ազգային վիճակագրական կոմիտեի հրապարակած տվյալները։

Ընդ որում, դեկտեմբերին արտադրված արդյունաբերական արտադրանքի ծավալը կազմել է 517 548.0 մլն դրամ. 2024 թվականի դեկտեմբերի նկատմամբ աճը կազմել է 38,6%, իսկ 2025 թվականի նոյեմբերի նկատմամբ՝ 25%։

Հանքագործական արդյունաբերության և բացահանքերի շահագործման ոլորտում արտադրանքի ծավալը նախորդ տարի կազմել է 514 693.8 մլն դրամ (նախորդ տարվա համեմատ աճը՝ 6,4%), մշակող արդյունաբերությունում՝ 2 402 422.8 մլն դրամ (աճը՝ 3,3%)։

Էլեկտրականության, գազի, գոլորշու և լավորակ օդի մատակարարման ոլորտի ծավալը կազմել է 378 261.6 մլն դրամ (աճը՝ 10,7%), իսկ ջրամատակարարման, կոյուղու, թափոնների կառավարման և վերամշակման ոլորտինը՝ 32 366.9 մլն դրամ (աճը՝ 2,7%)։

2025 թվականի արդյունաբերական արտադրանքի կառուցվածքում ամենամեծ մասնաբաժինն ընկնում է մշակող արդյունաբերությանը՝ 72,2%։ Հանքագործական արդյունաբերության և բացահանքերի շահագործման տեսակարար կշիռը կազմում է 15,4%, էլեկտրականության, գազի, գոլորշու և լավորակ օդի մատակարարմանը՝ 11,4%, իսկ ջրամատակարարման, կոյուղու, թափոնների կառավարման և վերամշակմանը՝ 1%։ ($1-ը = 377,7 դրամ)։