Հայաստանում հնդկաձավարի գների աճը պայմանավորված չէ արտարժույթի տատանումներով. ՏՄՊՊՀ

ԵՐԵՎԱՆ, 11 դեկտեմբերի. /ԱՌԿԱ/ Հայաստանում հնդկաձավարի գնի կտրուկ աճը պայմանավորված չէ արտարժույթի տատանումներիով, հինգշաբթի ՀՀ կառավարության նիստում ասել է,  Տնտեսական մրցակցության պաշտպանության պետական հանձնաժողովի  նախագահ Արտակ Շաբոյանը։

Դրամը սկսել է արժեզրկվել նոյեմբերի 24–ից հետո, երբ փոխարժեքը բարձրացել էր 16,6 կետով` հասնելով 435 դրամի` թարմացնելով 8 տարվա նվազագույն ցուցանիշը։  Միաժամանակ դոլարի փոխարժեքն ամեն օր աճի միտում է ցուցադրում և այսօր արդեն հասել է մեկ դոլարի դիմաց 457.1 դրամի։

Շաբոյանի խոսքերով հայկական շուկայում հնդկաձավարի էական թանկացման վրա ազդել են միանգամից մի քանի գործոններ`  ինչպես ազգային դրամի փոխարժեքի փոփոխությունները, այնպես էլ ձեռքբերման գները։

«Առաջին հերթին հնդկաձավարի գների աճի վրա ազդել են ձեռքբերման գները, որոնք մեծ չափով ավելացել են: Այս ապրանքատեսակը մեր տնտեսվարողները հիմնականում ներմուծում են ռուսաստանյան շուկայից, և այս տարվա ընթացքում, պայմանավորված այն հանգամանքով, որ հնդկաձավարի բերքը կրճատվել է մոտ 20 տոկոսով, գները կտրուկ ավելացել են, մի քանի անգամով են ավելացել»,–ասել է Շաբոյանը:

Նա տեղեկացրել է, որ Ռուսաստանի հակամենաշնորհային ծառայությունն այս ուղղությամբ արդեն ուսումնասիրություն է սկսել, որոշ տնտեսվարողների նկատմամբ վարչական վարույթներ է հարուցել:

Շաբոյանը ընդգծել է, որ արդեն կապվել է  ռուս գործընկերոջ հետ և խնդրել, որպեսզի այս ուղղությամբ համատեղ ուսումնասիրություն կատարեն և տեղեկատվությունն օպերատիվ կարգով փոխանակեն:–0–