Հայաստանի նախաձեռնությամբ կքննարկվի ԵԱՏՄ սակագնային արտոնությունների միասնական համակարգից օգտվող երկրների ցանկից Թուրքիային հանելու հարցը
ԵՐԵՎԱՆ, 22 հոկտեմբերի./ԱՌԿԱ/. Հայաստանի փոխվարչապետ Մհեր Գրիգորյանի նախաձեռնությամբ` առաջիկա Եվրասիական տնտեսական հանձնաժողովի խորհրդի նիստի օրակարգում կընդգրկվի և կքննարկվի մի շարք երկրներ, այդ թվում՝ Թուրքիան, ԵԱՏՄ սակագնային արտոնությունների միասնական համակարգից օգտվող երկրների ցանկից հանելու վերաբերյալ հարցը, հաղորդում է ՀՀ կառավարության մամուլի ծառայությունը։
Համաձայն Եվրասիական տնտեսական միության մասին պայմանագրի 36-րդ հոդվածի՝ ԵԱՏՄ անդամ պետությունների կողմից տրամադրվում են սակագնային արտոնություններ զարգացող և առավել թույլ զարգացած երկրների ծագում ունեցող ապրանքների նկատմամբ։ Արտոնություններից օգտվող երկրների ցանկերը հաստատվել են 2009 թվականին Մաքսային միության Հանձնաժողովի որոշմամբ։ Ներկայումս արտոնություններից օգտվում են թվով 103 երկրներ:
ՀՀ կառավարությունը չորեքշաբթի որոշում կայացրեց ժամանակավոր արգելել թուրքական ծագման ապրանքների ներմուծումը։ Այս որոշումն ուժի մեջ է մտնում 2020թ.–ի դեկտեմբերի 31–ին և գործում է վեց ամիս ժամկետով։–0–
