Հայաստանի և Ռուսաստանի փոխվարչապետերը քննարկել են Հարավային Կովկասում տրանսպորտային կոմունիկացիաների վերականգնումը
ԵՐԵՎԱՆ, 20 ապրիլի./ԱՌԿԱ/. Մոսկվայում կայացել է Հայաստանի Հանրապետության փոխվարչապետ Մհեր Գրիգորյանի և Ռուսաստանի Դաշնության կառավարության նախագահի տեղակալ Ալեքսեյ Օվերչուկի հանդիպումը, հաղորդում է ՀՀ կառավարության մամուլի ծառայությունը:
Կողմերը քննարկել են հայ-ռուսական առևտրատնտեսական համագործակցության արդիական հարցերը:
«Հանդիպման ընթացքում անդրադարձ է կատարվել նաև Հայաստանի Հանրապետության, Ռուսաստանի Դաշնության և Ադրբեջանի Հանրապետության փոխվարչապետերի համանախագությամբ գործող եռակողմ աշխատանքային խմբի շրջանակներում քննարկվող Հարավային Կովկասի տարածաշրջանում տրանսպորտային կոմունիկացիաների վերականգնման թեմային», – նշվում է գերատեսչության հաղորդագրության մեջ:
Նշենք, որ Գրիգորյանը գտնվում է Ռուսաստանում` ՀՀ վարչապետ Նիկոլ Փաշինյանի գլխավորած պատվիրակության կազմում` Փաշինյանի ռուսաստանյան պաշտոնական այցի շրջանակում։–0–
