Wizz Air լոուքոսթերը դադարեցնում է գործունեությունը Աբու Դաբիի շուկայում
ԵՐԵՎԱՆ, 14 հուլիսի․/ԱՌԿԱ/․ Երկուշաբթի Wizz Air լոուքոսթերը հայտարարել է, որ վեց տարվա գործունեությունից հետո դուրս է գալիս Աբու Դաբիի շուկայից՝ կենտրոնանալով իր հիմնական՝ եվրոպական շուկայի վրա, հաղորդում է Reuters–ը։
Ընկերությունը պատճառաբանել է որոշումը տարածաշրջանի աշխարհաքաղաքական անկայունությամբ և շուկայի սահմանափակ հասանելիությամբ։
Wizz Air-ը, որը սկզբնապես կենտրոնացած էր Կենտրոնական և Արևելյան Եվրոպայի վրա, բայց հետագայում ընդլայնվել էր դեպի Մեծ Բրիտանիա, Իտալիա և Ավստրիա, նշել է, որ այսուհետ կկենտրոնանա առավել շահութաբեր եվրոպական բիզնեսի վրա։
Ընկերության հայտարարության մեջ նշվում է, որ աշխարհաքաղաքական անկայունությունը հաճախ հանգեցրել է օդային տարածքների փակումների Աբու Դաբիի շուրջ, ինչը նվազեցրել է պահանջարկը։
Միևնույն ժամանակ, Մերձավոր Արևելքի շոգ կլիման բացասաբար է ազդել շարժիչների արդյունավետության վրա, ինչի պատճառով դժվարացել է պահպանել ցածրարժեք գործելու մոդելը։
«Մատակարարման շղթայի սահմանափակումները, աշխարհաքաղաքական անկայունությունը և շուկայի սահմանափակ հասանելիությունը ավելի ու ավելի դժվար են դարձրել մեր սկզբնական նպատակների իրականացումը», - ասել է Wizz Air-ի գլխավոր–գործադիր տնօրեն Յոժեֆ Վարադին։
