Կյանքի ապահովագրության առաջին փորձը խթան կդառնա Հայաստանում այս սեգմենտի զարգացման համար. ԿԲ նախագահ

ԵՐԵՎԱՆ, 4 փետրվարի․/ԱՌԿԱ/․ LIGA INSURANCE-ը Հայաստանում առաջինը կսկսի մատուցել կյանքի ապահովագրության ծառայություններ, իսկ մնացած ապահովագրական ընկերությունները կհետևեն նրա օրինակին: Այս մասին հայտարարել է ՀՀ ԿԲ նախագահ Մարտին Գալստյանը՝ պատասխանելով «ԱՌԿԱ» գործակալության հարցերին:

ՀՀ ԿԲ–ն հունվարի 30–ին հաստատել է LIGA INSURANCE ապահովագրական ընկերության 100% բաժնետոմսերի ձեռքբերումը Grawe Group  ավստրիական ընկերության և C-Quadrat Investment Group ներդրումային խմբի կողմից։ Grawe Group ընկերությունը հայկական LIGA Insurance–ի 75% բաժնետոմսերի սեփականատերն է, մնացած 25%–ը C-Quadrat Investment Group–ի մասնաբաժինն է։

Գալստյանն այս գործարքն անվանել է «փայլուն օրինակ» այն բանի, թե ինչպես հեղինակավոր միջազգային դերակատարի կողմից ձեռքբերման արդյունքում հայկական ընկերությունը հնարավորություն ստացավ հասանելիություն ունենալ լավագույն փորձին և փորձագիտությանը:

ԿԲ ղեկավարի խոսքով՝ սա կհանգեցնի «շղթայական ռեակցիայի». մյուս ապահովագրողները ևս կձգտեն մատուցել նույն որակի ծառայություններ, ինչ կյանքի ապահովագրության ոլորտ առաջինը մուտք գործած ընկերությունը:

Բացի այդ, նա հայտնել է «Ապահովագրության մասին» օրենքում օրենսդրական փոփոխությունների նախապատրաստման մասին: Կարգավորողն աշխատում է միասնական ունիվերսալ լիցենզիայի գաղափարի շուրջ, որը թույլ կտա ընկերություններին մեկ լիցենզիայով իրականացնել թե՛ կյանքի, թե՛ ոչ կյանքի ապահովագրություն:

«Մենք կաշխատենք համընդհանուր լիցենզիայի գաղափարի շուրջ, այսինքն՝ որպեսզի կյանքի և ոչ կյանքի ապահովագրությամբ զբաղվող ընկերությունների լիցենզավորումը լինի ոչ թե առանձնացված, այլ լինի միասնական ունիվերսալ լիցենզիա, որը թույլ կտա մեկ բիզնեսին աշխատել երկու ուղղություններով», — ասել է Գալստյանը:

GRAWE Group-ի մասին

Հիմնադրվել է Ավստրալիայում 1828թ․–ին։ԿենտրոնականևԱրևելյան Եվրոպայի ամենահին և ամենահեղինակավոր ապահովագրական խմբերից մեկն է։ Ընկերությունն ունի միջազգային կողմնորոշում, գործում է 14 երկրում, խմբի կազմի մեջ են մտնում Կենտրոնական, Արևելյան և Հարավարևելյան Եվրոպայում 20 դուստր ապահովագրական ընկերություններ, 3 բանկև անշարժ գույքի ոլորտի ընկերություններ։

C-Quadrat ներդրումային խմբի մասին

1991թ․–ին Վիեննայում հիմնադրված C-Quadrat Ներդրումային Խումբը ժամանակի ընթացքում ձևավորվել է որպես միջազգային ներդրումային խումբ, որը վստահություն է վայելում համաշխարհային առաջատար ֆինանսական հաստատությունների և մասնավոր ներդրողների շրջանում, այդ թվում՝ ավելի քան 80 ապահովագրական ընկերությունների։ C-Quadrat Ներդրումային Խումբը միավորում է ակտիվների կառավարիչ հանդիսացող ինը անկախ ընկերություններ՝ գլխամասային գրասենյակներով Վիեննայում և Լոնդոնում, ինչպես նաև 21 երկրում ռազմավարական ներկայությամբ։

Խմբի անդամ -Quadrat Ampega Asset Management Armenia ընկերությունն արդեն ավելի քան 10 տարի հաջողությամբ գործում է Հայաստանում՝ կառավարելով կենսաթոշակային համակարգի շուրջ 450 000 մասնակիցների կենսաթոշակային ակտիվները։

LIGA INSURANCE ընկերության մասին

Հիմնադրվել է 2008թ․–ի մայիսին։ Ներկայացված է հանրապետության բոլոր մարզերում՝ հանդիսանալով Հայաստանի ամենամեծ ապահովագրական ընկերությունը։ Ընդհանուր կապիտալի ցուցանիշով շուկայի առաջատարն է՝ 7․6 մլրդ դրամ (20 մլն դոլար)։