Հայտնի հանրային սննդի օբյեկտի արտադրական գործունեությունը կասեցվել է սանիտարական կանոնների խախտման պատճառով (ՖՈՏՈ)

ԵՐԵՎԱՆ, 2 մարտի․/ԱՌԿԱ/․ Կասեցվել է հանրահայտ հանրային սննդի օբյեկտի արտադրական գործունեությունը։

Սննդամթերքի անվտանգության տեսչական մարմնի Երևանի կենտրոնի տեսուչների կողմից «ԱՄՏՋ» ՍՊ ընկերությունը պատկանող Երևանի Թումանյան 19 հասցեում գտնվող «Կարաս» հանրային սննդի օբյեկտում իրականացված ստուգման ընթացքում պարզվել է, որ խախտվել են սանիտարական կանոնների, հիգիենիկ նորմատիվների պահանջները, հայտնում են ՍԱՏՄ-ից։

Գերատեսչությունից տեղեկացնում են, որ

- առաստաղի վրա առկա են եղել վնասված տեղեր, ինչը նպաստել է կեղտի կուտակմանը, գոլորշու խտացմանը, անցանկալի բորբոսների աճին,

- խոհանոցի հատակի որոշ հատվածներ վնասված են եղել,

- արհեստական օդափոխության համակարգը եղել է ոչ բարվոք վիճակում, ինչը չի կանխել աղտոտված օդի ներթափանցումը տարածք,

- դեպի դուրս բացվող պատուհաններից մեկը և ետնամուտքի դուռը չեն ունեցել միջատապաշտպան ցանց, հնարավոր է եղել աղտոտիչների ներթափանցումը,

- ետնամուտքի և խոհանոցի դռները հարթ չեն եղել, պատված չեն եղել չներծծող, մաքրվող աղտահանվող նյութերով,

- առկա սառնարանները, որոնք անմիջական շփման մեջ են եղել սննդամթերքի հետ, չեն պահվել նորոգ վիճակում։

Սննդամթերքի անվտանգության տեսչական մարմնի ղեկավարի որոշմամբ՝ «Կարաս» հանրային սննդի օբյեկտի արտադրական գործունեությունը կասեցվել է, հայտնաբերված խախտումները վերացնելու համար սահմանվել է ժամկետ: