Հայաստանում սիգի բուծումը տնտեսապես շահավետ չէ տեղական ձկնաբուծական ձեռնարկությունների համար. փորձագետ

ԵՐԵՎԱՆ, 1 հոկտեմբերի. /ԱՌԿԱ/. Հայաստանում սիգի արհեստական աճեցումը տնտեսապես շահավետ չէ տեղական արտադրողների համար, «ԱՌԿԱ» գործակալությանն ասաց «Հայ ձկնաբույծների միավորում» հասարակական կազմակերպության նախագահ Արթուր Աթոյանը։

Տարեցտարի Սևանա լճում սիգի պաշարները կտրուկ նվազում են, և այսօրվա դրությամբ կազմում են ընդամենը մոտ 6,5 տոննա։

«Սիգի աճեցումն ավելի բարդ գործընթաց է Սևանի իշխանի կամ թառափի բուծման համեմատ, այդ պատճառով մեր ձկնաբուծական ձեռնարկություններն ավելի հետաքրքրված են այդ ձկնատեսակների աճեցմամբ», – ասաց Աթոյանը։

Ըստ փորձագետի` սիգի աճեցման նկատմամբ հետաքրքրության բացակայության ևս մեկ պատճառ է արտաքին շուկայում այդ ձկնատեսակի նկատմամբ ցածր պահանջարկը։ Միաժամանակ Աթոյանի խոսքերով` սիգը մեծ պահանջարկ ունի ներքին շուկայում, որը, սակայն, այնքան էլ մեծ չէ Սևանի իշխանի և թառափի պահանջարկի համեմատ։

Սևանա լճի սիգի պաշարներն իրենց առավելագույն ցուցանիշին են հասել նախորդ դարի 80-ականների վերջին–90–ականների սկզբին` մոտ 30 հազար տոննա։ Երկու տարի առաջ այդ ցուցանիշը կազմում էր 8.5 տոննա, իսկ նախորդ տարի սիգի պաշարները հասել են նվազագույնի` կազմելով մոտ 6.5 տոննա։ Հաշվարկն արդեն ոչ թե հազար տոննաներով է, այլ պարզապես տոննաներով։–0–